Маршрут Бешанковічы >
Кропкі маршрута Бешанковічы
Мясцовыя жыхары распавялі, што ў 1812 г. у палацы вядомага шляхецкага роду Цеханавецкіх, які да нашых дзён не захаваўся, спыняўся Напалеон. У выдатным стане захаваўся флігель палаца, некалькі каменных гаспадарчых пабудоў і невялікі будынак канюшні. Да нашых дзён дайшлі часткі парку маёнтка. Будынкі выстаўлены на продаж.
Захаваўся палац магнацкага роду Храптовічаў. Разнастайныя службовыя пабудовы і флігелі палаца і сёння выкарыстоўваюцца ў гаспадарчых мэтах. На хрысціянскіх могілках можна ўбачыць цагляныя капліцы і старажытную браму ў стылі неаготыкі. Царква Св. Іллі ўзведзена з цэглы ў рэтраспектыўна-рускім стылі ў 1866 г. На набярэжнай Заходняй Дзвіны захаваліся дабротныя будынкі складаў. У горадзе захаваліся старажытныя габрэйскія могілкі.
Праваслаўная святыня Св. Мікалая ў рэтраспектыўна-рускім стылі сінадальнага напрамку пабудавана з дрэва ў 1857 г. Адноўлена царква ў канцы ХХ ст. Вялікія вокны храма гарманічна глядзяцца на фоне гарызантальнай шалёўкі. Гэтая блакітная царква стаіць у атачэнні векавых дрэў.
У гэтым сядзібным доме старажытнага роду Мядзведзкіх да нядаўняга часу дзейнічала школа, але цяпер ён закрыты. Дом акружаны пейзажным паркам, які захаваўся ў добрым стане, з мноствам цяністых алей і маляўнічых палян. З гаспадарчых пабудоў у дабротным стане захаваліся ўзведзеныя з цэглы кузня, кухня, вяндлярня ў выглядзе простай круглай вежы.
На пакатым узвышшы непадалёк ад апусцелай вёскі ў 1906 г. з цэглы пабудаваны праваслаўны храм Св. А. Неўскага ў рэтраспектыўна-рускім стылі. Узведзена царква на месцы старажытнага храма, магчыма, уніяцкага, пабудаванага ў сярэдзіне XVIII ст. А да гэтага, па мясцовай легендзе, на гэтым месцы было паганскае капішча з мноствам каменных статуй багоў нашых продкаў, абсаджанае вялізнымі дубамі.
Сёння царква Раства Багародзіцы ў руінах, але ўсё яшчэ можна разгледзець элементы яе багатага дэкору. Узведзена царква з цэглы ў рэтраспектыўна-рускім стылі сінадальнага напрамку ў 1895 г.
На ўскрайку вёскі ўзвышаецца царква Св. Мікалая. Пабудавана святыня з цэглы ў неарускім стылі ў 1882 г. Знешнія сцены храма багата дэкарыраваны, захаваўся драўляны купал званіцы. Царкве патрабуецца тэрміновая кансервацыя. Побач з храмам, на невялікіх старажытных могілках, захаваўся вялікі каменны крыж і некалькі каменных надмагільных пліт з надпісамі і сімваламі.
Магчыма, гэтая пабудова раней была адным з флігеляў сядзібнага дома, які да нашых дзён не дайшоў. Магчыма, гэта і ёсць сам сядзібны дом, узведзены з чырвонай цэглы прыкладна ў сярэдзіне ХІХ ст. Побач знаходзіцца яшчэ адна дабротная пабудова. Будынкі стаяць сярод рэштак занядбанага парку.
У 1853 г. на беразе Заходняй Дзвіны ўзведзены цагляны Траецкі касцёл у стылі класіцызму. Храм некалькі разоў аднаўляўся. У 1935 г. у касцёле зрабілі склад. Падчас Другой сусветнай вайны храм быў разбураны. Адрэстаўраваны ў 1999 г. У 1896 г. пабудаваны цагляны праваслаўны храм Св. Троіцы ў рэтраспектыўна-рускім стылі. Да 1990 г. быў у руінах, але пасля яго аднавілі.
Фотагалерэя