Маршрут Чырвоны Бераг >
Кропкі маршрута Чырвоны Бераг
Траецкая царква ў рэтраспектыўна-рускім стылі сінадальнага напрамку пабудаваная з дрэва ў 1869 г. Удала пафарбаваны ў сінія колеры храм добра праглядаецца з трасы Р43. Недалёка ад храма, зусім побач з дарогай, захаваўся будынак паштовай станцыі, пабудаваны з цэглы ў 1839 г. Мясцовыя жыхары спрабуюць аднавіць будынак станцыі і адкрыць у ёй прыдарожнае кафэ.
У цэнтральнай частцы горада можна ўбачыць дзве каталіцкія капліцы. Адна – капліца Св. Казіміра – узведзена з цэглы ў 1938 г. Іншая пабудавана крыху раней – у 1911 г. Сёння ў ёй знаходзіцца этнаграфічны і гістарычны музей горада.
Першая згадка пра горад датуецца 1136 г. З пачатку XV ст. уваходзіў у склад ВКЛ. У 1548 г. згадваецца яшчэ як горад, а вось ужо ў 1593 г. як сяло. Чаму так адбылося – невядома. У горадзе можна ўбачыць высокія курганы і крапасныя валы, якія некалі служылі абарончымі збудаваннямі.
У 1902 г. побач з невялікай плошчай вёскі па праекце архітэктара П. Калініна ўзводзіцца цагляная царква Усіх Святых у неарускім стылі. Фінансаваў будаўнічыя работы памешчык Раговіч. Побач знаходзіцца невялікі цагляны дамок святара. Захаваліся таксама агароджа і брама. У цэнтральнай частцы вёскі можна ўбачыць будынак духоўнага вучылішча.
Ёсць два шляхі да возера. Першы – ад вёскі Стрэнькі, што раскінулася ўздоўж дарогі Р43. Іншая дарога вядзе на вёску Заполле, з яе ёсць з’езд на базу адпачынку. Побач з гэтай базай раскінулася на ўскраіне ляснога масіву Святое Возера. Возера жывіцца крыніцамі, з якімі звязана цікавая легенда.
У 1807 г. у класічным стылі з цэглы тут збудаваны ўнікальны помнік нацыянальнай спадчыны краіны – Пакроўская царква. Тры ўваходы ў храм упрыгожаныя высокімі белымі лесвіцамі. У 1989 г. святыня рэстаўрыраваная і адкрытая для вернікаў.
Ад сядзібы вядомага шляхецкага роду Аскеркаў, якая некалі квітнела тут, захавалася некалькі дыхтоўных гаспадарчых пабудоў, збудаваных з цэглы ў сярэдзіне XIX ст. Сыраварня і стайня нядаўна былі разабраныя. Захаваўся двухпавярховы корпус бровара. Ёсць верагоднасць, што цяпер гэты будынак выстаўлены на продаж.
Побач з дарогай М5, якая вядзе міма Жлобіна на Гомель, стаіць зусім невялікая вёсачка Чырвоная Слабада. Раней, аднак, у ёй было не менш за 150 двароў. Каменны храм збудаваны ў вёсцы ў рэтраспектыўна-рускім стылі з цэглы ў 1866 г.
У першую чаргу тут варта паглядзець маёнтак Гатоўскіх: браму, бровар, стайню, розныя гаспадарчыя пабудовы, цудоўны пейзажны парк на беразе невялікай рачулкі, флігель палаца і сам палац, пабудаваны ў стылі эклектыкі з цэглы ў 1890 г. Абавязкова варта паглядзець унутранае ўбранне палаца. Недалёка ад палаца Гатоўскіх, на месцы дзіцячага канцлагера, у 2006 г. створаны мемарыяльны комплекс.
Фотагалерэя