Маршрут Дамачава >
Кропкі маршрута Дамачава
Гэты драўляны храм у стылі народнага дойлідства пабудаваны на месцы гібелі праваслаўнага асветніка Афанасія Філіповіча ў 1901 г. У 1988 г. святыня была адноўленая. З 1995 г. пры храме дзейнічае праваслаўны мужчынскі манастыр. Сілуэт царквы сваімі простымі рысамі нагадвае вясковы дом.
У 1866 г. па праекце архітэктараў М. Барташэўскага і К. Гросмана тут ўзведзена цагляная царква Нараджэння Найсвяцейшай Багародзіцы ў рэтраспектыўна-рускім стылі. Сёння вёска ўваходзіць у межы горада Брэста. Тут таксама можна ўбачыць грандыёзныя збудаванні форта №5 Брэсцкай крэпасці, пабудаваныя з жалезабетону ў 187З г. Варта прайсці на тэрыторыю форта і паглядзець гэты вялізны будынак знутры.
Гэты пасёлак упрыгожваюць дзве культавыя пабудовы. Бліжэй да яго цэнтру ў 1905 г. з дрэва ўзведзеная царква Св. Апостала Лукі, стылізаваная пад неарускі стыль. Пабудаваная святыня на месцы, дзе калісьці стаяў драўляны ўніяцкі храм. На спадзістым узгорку ўзвышаецца цагляны касцёл Ушэсця Дзевы Марыі, пабудаваны ў стылі класіцызму ў 1823 г. Прыбудовы да касцёла ўзведзеныя ў сярэдзіне ХХ ст.
Тут захаваўся цагляны будынак чыгуначнай станцыі, пабудаванай ў 1897 г. Гэтая пабудова ў стылі эклектыкі і сёння захапляе якасцю цаглянага мура і гарманічнасцю злучэння розных аб’ёмаў будынка. На першы погляд здаецца, што гэта захавалася частка нейкага старадаўняга замка або сядзібнага дома.
Драўляная царква Св. Іллі пабудаваная тут ў 1789 г. Сціплы і просты будынак выкананы ў стылі народнага дойлідства. Унутранае аздабленне сцен першапачаткова прадугледжанае без шалёўкі.
Храм збудаваны ў стылі народнага дойлідства, як мяркуецца, у канцы XVIII ст. Першапачаткова ён быў уніяцкім. У 1848 г. касцёл быў часткова перабудаваны. Магчыма, менавіта тады да асноўнага аб’ёма былі прыбудаваныя прытвор, двух’ярусная званіца незвычайнай канструкцыі і рызніца. Сёння гэта праваслаўная Спаса-Праабражэнская царква.
У добрым стане захаваўся будынак паштовай станцыі. Да нядаўняга часу будынак выкарыстоўваўся як жыллё, затым як складское памяшканне. Пабудавана станцыя з цэглы ў 1851 г. Хутчэй за ўсё, яна ўяўляе сабой адзін з тыпавых праектаў пабудоў падобнага прызначэння. Сёння паштовыя станцыі ў нашай краіне ўжо становяцца рэдкасцю.
Пакроўскі храм пабудаваны з драўлянага бруса ў стылі народнага дойлідства ў 1870 г. Да нашых дзён храм дайшоў без істотных змен, толькі званічны купал першапачаткова, як сцвярджаюць старажылы, быў вышэйшы і іншай формы. У храме можна палюбавацца старажытнымі абразамі, напісанымі ў сярэдзіне ХVII ст.
Царква Св. Мікалая ўзведзеная з дрэва, магчыма, у самым канцы XVI ст., але не пазней за 1701 г. Пабудаваная святыня ў стылі барока як уніяцкі храм. У 60-я гг. XIX ст. царква аднаўлялася і перабудоўвалася, было дабудаванае памяшканне бабінца. Асаблівую ўвагу варта надаць рэдкай канструкцыі драўлянай трох’яруснай капліцы, пабудаванай побач з царквой.
Фотагалерэя