Маршрут Глыбокае >
Кропкі маршрута Глыбокае
Тут цудоўна захаваўся сядзібны дом, пабудаваны з цэглы ў класічным стылі на мяжы XVIII–XIX стст. Непадалёк стаіць аднапавярховы флігель. Ад маёнтка таксама засталося шмат гаспадарчых пабудоў, прыдатных для выкарыстання і сёння. Пабудовы дагледжаныя і трымаюцца ў належным стане.
Радавая забудова XVIII ст. Мемарыяльная калона ў гонар Канстытуцыі ад 03.05.1791 г. Капліца Св. Іллі на могілках Капцёўка. Пахаванне польскіх жаўнераў (1920 г.). Жылыя карпусы кляштараў базіліян і кармелітаў (XVII ст.). Троіцкі касцёл, узведзены ў 1764 г. у стылі барока, і былы кармяліцкі касцёл (1639 г.), сёння вядомы як праваслаўны сабор Раства Багародзіцы.
Наводдаль ад вёскі стаіць самотная праваслаўная царква, якая лічыцца адной з найпрыгажэйшых праваслаўных цэркваў Віцебшчыны. Царква Раства Багародзіцы багата дэкарыравана рустам, ляпнымі аркамі і аб'ёмнымі калонамі. Узведзена святыня ў 1914 г. на тэрыторыі былога хутара Папоўшчына.
Драўляная Успенская царква ў псеўдарускім стылі пабудавана на ўскрайку вёскі ў 1748 г. Магчыма, гэты храм першапачаткова ўзводзіўся як уніяцкі ці каталіцкі, а ў першай палове XIX ст. быў перабудаваны, зменены і ў рэшце рэшт менавіта ў такім выглядзе дайшоў да нас. Побач стаіць драўляная званіца. Храм акружае каменная агароджа.
На хрысціянскіх могілках у добрым стане захавалася капліца-пахавальня ўладароў мясцовага маёнтка Друцкіх-Любецкіх. Узведзена яна з часанага палявога каменю ў стылі класіцызму ў 1840-х гг. Захаваўся таксама вадзяны млын, пабудаваны з дрэва ў 1862 г. Можна ўбачыць уязную браму маёнтка, гаспадарчыя пабудовы і значна перабудаваны сядзібны дом.
Ад сядзібы Быхаўцаў, якая квітнела тут з XVIII ст., захаваліся дабротныя цагляныя гаспадарчыя пабудовы: свіран з тэрасай на вялізных каменных калонах, цагляная канюшня, якая сёння служыць калгасу складам, і гаспадарчая пабудова з прасторнай мансардай. Вакол часткова захаваўся старажытны сядзібны парк.
Гэтую царкву пабудавалі ў 1823 г. як касцёл. У 1866 г. ён пераасвечаны ў праваслаўны храм. Сёння гэта Спаса-Праабражэнская царква. Узведзены храм з цэглы ў стылі класіцызму. Перад святыняй высіцца трох’ярусная цагляная брама-званіца незвычайнай канструкцыі. Побач яшчэ адна каменная званіца.
У 1792 г. пры фінансаванні ўладароў маёнтка Бжастоўскіх узведзены цагляны касцёл Святой Ганны ў стылі класіцызму . У 1922 і 1990 гг. касцёл рэстаўравалі. Дзякуючы намаганням ксяндза Ю. Булко, які пахаваны побач з касцёлам, вакол храма быў разбіты пышны пейзажны сквер з вечназялёнымі раслінамі і белакаменнымі скульптурамі.
Кляштар францысканцаў заснаваны тут у 1642 г. Закрыты ў 1851 г. Захаваўся жылы будынак кляштара (1805 г.). У 1766 г. пры кляштары пабудаваны цагляны касцёл Св. Дзевы Марыі ў стылі барока. У 1948 г. закрыты. Яго вярнулі каталікам толькі ў 1989 г. Брама ў стылі класіцызму (1869 г.). У цагляным будынку кляштара можна пабачыць дзеючую батлейку.
Фотагалерэя