Маршрут Празарокі >
Кропкі маршрута Празарокі
Захаваліся фрагменты пейзажнага парку, якія і сёння яшчэ не згубілі рысы некалі прадуманай структуры. Не страцілі сваю маляўнічасць і штучныя сажалкі. Ад былой сядзібы Лісоўскіх "Варанец" захавалася некалькі закінутых гаспадарчых пабудоў, вялізны будынак вадзянога млына і сядзібны дом, які быў пабудаваны ў 1886 г. і значна відазменены з часам.
З сярэдзіны ХІХ ст. у добрым стане захаваліся разнастайныя будынкі былой шляхецкай сядзібы Козел-Паклеўскіх. Гаспадарчыя і службовыя пабудовы былі дыхтоўна складзеныя з каменю і цэглы. Будынкі флігеля і жылога дома ўдала спалучаюць у сабе жылыя цагляныя і драўляныя памяшканні. Побач знаходзяцца фрагменты старога парку ХІХ ст.
Ад старажытнай шляхецкай сядзібы, якая квітнела тут, магчыма, з канца XVIII ст., у добрым стане захаваўся драўляны сядзібны дом у класічным стылі. Да нядаўняга часу выкарыстоўваўся як навучальная і адміністрацыйная ўстанова. Цяпер будынак у занядбаным стане, патрабуецца тэрміновая кансервацыя. Ад паркавых насаджэнняў захавалася ўязная алея.
Захаваўся невялікі цагляны свіран і фрагменты ўязной алеі, якая некалі вяла да вялізнага маёнтка. Можна ўбачыць драўляны будынак школы, пабудаваны ў 1924 г., а побач – аднекуль прывезены старажытны каменны крыж. Месца вакол крыжа дагледжана і абсаджана кветкамі.
Прыгожы цагляны будынак чыгуначнага вакзала з прадуманымі архітэктурнымі прапорцыямі пабудаваны ў стылі класіцызму ў 1902 г. Варта спадзявацца, што прыгажосць падобных пабудоў яшчэ доўгі час будзе адбіваць ахвоту разбураць іх і ўзводзіць нешта больш сучаснае, кажучы, што яны састарэлі і аджылі сваё.
Стаіць гэты праваслаўны храм на месцы больш старога драўлянага храма, які быў узведзены ў сярэдзіне ХІХ ст., але па невядомых прычынах знік да канца гэтага стагоддзя. Цяперашні цагляны храм пабудаваны ў рэтраспектыўна-рускім стылі ў 1900 г. У ім захаваліся іконы з папярэдняй святыні, напісаныя ў пачатку XVIII ст.
Адшукаць гэты каменны крыж можна на мясцовых могілках. Надмагільны пагорак, які, магчыма, некалі існаваў пад ім, даўно сцёр час. А магчыма, гэта некалі быў паклонны крыж, вакол якога з часам і ўзніклі могілкі.
Тут знаходзіцца прыгожы манументальны будынак каталіцкай святыні. Пабудаваны касцёл Узнясення Дзевы Марыі ў неараманскім стылі з якаснай чырвонай цэглы ў 1899 г. Трохнефная базіліка, безумоўна, з'яўляецца адным з найпрыгажэйшых прыкладаў гэтага стылю. У вёсцы можна ўбачыць магілу тэатральнага дзеяча і акцёра Ігната Буйніцкага, які нарадзіўся ў суседнім фальварку ў 1861 г. Каменная царква Св. Пятра і Паўла пабудавана ў 1909 г.
Канструкцыя і вонкавы дэкор будынка чыгуначнай станцыі ў Фарынава пераклікаецца стылем са станцыяй у Загацці. Магчыма, абодва вакзалы былі ўзведзеныя па аднаму з тыпавых праектаў таго часу. Сёння станцыю спрабуюць перарабіць пад культавы будынак, хутчэй за ўсё, гэта будзе праваслаўны храм.
Фотагалерэя