Маршрут Сноў >
Кропкі маршрута Сноў
Драўляная царква Св. Георгія ў стылі народнага дойлідства ўзведзена ў 1784 г. Выдатна, што падобныя будынкі захаваліся да нашых дзён. Усё ў ёй правільна і сціпла, гэтым яна і падкупляе. Удалая афарбоўка царквы дадала ёй вытанчанасці. Побач стаіць цагляная капліца-надмагілле М. Пратасевіча (XIX ст.).
Тут знаходзілася сядзіба знакамітага шляхецкага роду Абуховічаў, які з канца XVII ст. валодаў гэтымі землямі. Захаваўся арыгінальны будынак стайні з ляпнымі картушамі над уваходамі. Будынак флігеля з цэглы, узведзены ў пачатку XIX ст. Цікавы будынак свірна – спалучэнне каменнага фасада і драўлянага трысценка. Пакроўская царква з цаглянай агароджай пабудавана ў 1773 г. Побач з храмам стаіць капліца-пахавальня з вежамі. На старых могілках знаходзіцца яшчэ адна капліца-пахавальня (XIX ст.).
На штучным пагорку ў цэнтры вялікай вёскі ў 1915 г. пабудавана Крыжаўзвіжанская царква ў неарускім стылі з цэглы. У 1990 г. яна была адрэстаўраваная і адкрытая для прыхаджан. Падмурак складзены з часаных каменных блокаў. Рэльефнае ўбранне храма выканана з якаснага матэрыялу. Хупава аформлены ганак ў выглядзе арачнага падстрэшка на чатырох фігурных слупах.
Тут можна ўбачыць вялізныя сцены былога бровара і гаспадарчых пабудоў маёнтка роду Абуховічаў, закладзенага тут у сярэдзіне XIX ст. У старажытным парку стаяць яшчэ дужыя сцены былога сядзібнага дома. Усе будынкі пры належным даглядзе маглі б яшчэ паслужыць.
Фамільная капліца-пахавальня шляхецкага роду Слізняў пабудавана ў стылі класіцызму з цэглы ў 1842 г. на старадаўніх каталіцкіх могілках. Вялікі простакутны будынак упрыгожаны порцікамі, ад якіх захаваліся толькі калоны. Падобныя будынкі неадкладна варта хаця б кансерваваць.
Вядомы гэты шляхецкі маёнтак ВКЛ з XVII ст. Уладальнікі – Радзівілы, Мараўскія, Вітчэнштэйны. Ад маёнтка Мараўскіх, закладзенага ў XVIII ст., захаваліся два дыхтоўныя драўляныя свірны, вадзяны млын і сутарэнная частка лядоўні. На краі рэшткаў парку можна знайсці капліцу-пахавальню Мараўскіх, пабудаваную з цэглы ў стылі класіцызму ў 1786 г. На сцяне захавалася выява (фрэска) гатычнага алтара.
У 1905 г. тут пабудавана цагляная каталіцкая капліца ў стылі мадэрн. У 2007 г. праведзены аднаўленчыя работы і дабудаваны трохсценны аб’ём. У 1886 г. на рацэ Уша з дрэва пабудаваны вадзяны млын. Ён пацярпеў ад пажару падчас Другой сусветнай вайны, але пазней быў адноўлены.
Каля чыгуначнага пераезду захавалася невялікая капліца, пабудаваная з цэглы ў 1933 г. Па словах старажылаў, яна пастаўлена ў гонар салдат Дамініка Радзівіла, якія ваявалі ў 1812 г. на баку войскаў Напалеона. Першая капліца была ўзведзена на гэтым месцы ў 1813 г. У 1930-я гг. яна была знішчана, аднак кім – невядома.
У гэтай вёсцы з такой кранальнай назвай у 1875 г. у стылі неакласічнай архітэктуры з цэглы пабудавана капліца-пахавальня Пратасевічаў. Да пачатку XXI ст. яна знаходзілася ў паўразбураным стане. У 2010 г. капліцу пачалі рэстаўраваць. Аднаўленчыя работы ідуць вельмі павольна, хоць сёння адрэстаўраваная вежа-званіца і будынак пад новым дахам.
Вядомы Сноў з 1529 г. З 1564 г. – мястэчка ВКЛ. Тут захаваўся палац у стылі класіцызму, пабудаваны шляхецкім родам Рдултоўскіх у 1827 г. У 1925 г. Гарцінгі перадалі яго польскім памежнікам. Касцёл Св. Яна Хрысціцеля збудаваны ў 1760 г. У 1866 г. – зачынены. У 1991 г. адноўлены. Стыль барока. Царква Св. Казьмы і Дзям’яна пабудавана ў 1836 г. У Горным Снове захаваліся сядзібны дом (пачатак XIX ст.) і гаспадарчая пабудова сядзібы Гарцінгаў.
Фотагалерэя