Маршрут Ястрамбель >
Кропкі маршрута Ястрамбель
Па дарозе Р2, паміж пасёлкам Сасновы Бор і вёскай Чамялы, захаваўся будынак паштовай станцыі, пабудаванай з цэглы ў 1832 г. Цяпер у ёй дзейнічае аб'ект прыдарожнага сэрвісу.
Побач з дарогай на трасу М1 (Е30) знаходзяцца старажытныя габрэйскія могілкі (XVII ст.). Таксама можна ўбачыць двухпавярховую каменную пабудову, якая, магчыма, была паравым млыном. На плошчы знаходзіцца пажарнае дэпо з вежай (1903 г.). Успенская царква ў стылі рэнесансу з элементамі барока ўзведзена ў 1654 г. Пабудавана яна як капліца-базіліка ўніяцкага кляштара, які быў заснаваны тут у 1607 г.
Да нашых дзён ў напаўразбураным стане дайшла цагляная капліца-пахавальня ў стылі мадэрн. Пабудавана капліца ў 1876 г. на каталіцкіх могілках. Належала яна гаспадарам мясцовага маёнтка "Рэгінаў" роду Юндзілаў, якія валодалі навакольнымі землямі з сярэдзіны XVIII ст. Захаваліся фрагменты пейзажнага парку маёнтка.
Узведзены гэты драўляны храм у псеўдарускім стылі ў 1910 г. на месцы больш старога храма, вядомага з 70-х гг. XVIII ст. Асвечаны храм у гонар Св. Пятра і Паўла. Гэтая культавая пабудова сведчыць пра талент майстроў, якія ўзводзілі такія помнікі на тэрыторыі Беларусі.
Царква Св. Анны ў стылі класіцызму ўзведзена з цэглы ў 1845 г. У 1851 г. храм адрэмантавалі. Непадалёк ад царквы, у вялізным парку стаіць маштабны драўляны будынак польскай школы, пабудаваны ў 1930 г.
У 1930 г. на месцы самай маштабная бітвы 1863 г. узвялі цагляную капліцу. Яна стаіць зусім блізка ад дарогі Р43. У 1988 г. усталяваны мемарыяльны камень у гонар 125-годдзя гэтай бітвы. У 1863 г. на могілках пабудавана цагляная царква ў гонар Сергія Раданежскага ў рэтраспектыўна-рускім стылі.
У 1817 г. з бутавага каменю ўзведзена царква Св. Антонія ў стылі класіцызму. На старых каталіцкіх могілках можна ўбачыць капліцу-надмагілле ў выглядзе піраміды, пабудаваную з цэглы ў пачатку XVII ст. Архітэктурных помнікаў у выглядзе піраміды на тэрыторыі Беларусі захавалася не больш за дзясятак.
Будоўля сядзібнага дома і гаспадарчых пабудоў пачалася ў 1906 і доўжылася паўтары гады. Гаспадар сядзібы Ян Бохвіц назваў яе ў гонар сваёй маці. У 1909 г. сюды прыязджала Эліза Ажэшка. У пасляваенны час у сядзібе працаваў санаторый для лётчыкаў. Захаваўся прыгожы парк з сажалкамі. Сядзібнаму дому патрэбна тэрміновая кансервацыя.
Сядзібай у Ястрамбелі валодалі Падарэўскія, Рдутлоўскія, Катлубеі. Сядзібны дом пабудаваны ў 1897 г. У 1981 г. яго адрэстаўравалі. Гэты сядзібны дом з'яўляецца адным з самых прыгожых сядзібных дамоў Беларусі. Магчыма, дом быў прыватызаваны, і можна спадзявацца, што гэты архітэктурны помнік праіснуе яшчэ доўгі час.
Фотагалерэя