Маршрут Мір-1 >
Кропкі маршрута Мір-1
У 1904 г. у Міры быў пабудаваны аднапавярховы Г-падобны будынак гміны з цэглы. Савет гэтай найменшай адміністрацыйнай адзінкі самакіравання абіраўся на ўсеагульных выбарах і ажыццяўляў выканаўчую ўладу на даручанай тэрыторыі. У кампетэнцыі гэтага органа ўлады былі навучальныя ўстановы, бібліятэкі, транспарт, ахова здароўя, гандлёвыя аб'екты. Пасля Другой сусветнай вайны ў будынку дзейнічаў дом культуры.
На краі парку, бліжэй да Мірскага спіртзавода, захаваўся невялікі будынак у класічным стылі, пабудаваны з цэглы ў 1887 г. Гэта дом кіраўніка маёнтка «Замір'е» Святаполк-Мірскага. Побач руіны сядзібнага дома. Зусім нядаўна тут быў толькі земляны пагорак, а сёння падарожнік можа ўбачыць сцены скляпоў дома, частку прыступак ганка і канструкцыі перакрыццяў.
Прыкладна ў 20-я гг. XVI ст. прыдворны маршалак ВКЛ Юрый Іллініч пачаў узводзіць вялізны замак з каменю і цэглы ў стылі позняй готыкі. Наступны ўладальнік замка, Радзівіл Сіротка, працягнуў будоўлю і ўзвёў палацавы комплекс, пры гэтым надаўшы ўсёй пабудове рысы рэнесанснага стылю. Пасля вайны з Масковіяй (1654-1667 гг.) комплекс доўгі час быў у запусценні. Толькі ў 1730-я гг. Міхал Казімір Радзівіл аднавіў замак. У 1784 г. замак наведваў кароль Рэчы Паспалітай Станіслаў Аўгуст Панятоўскі. Апошні ўладальнік замка, князь Святаполк-Мірскі, таксама займаўся рэстаўрацыйнымі работамі.
У 1904 г. па праекце вядомага архітэктара Марфельда недалёка ад сцен замка была ўзведзена цагляная капліца-пахавальня ў стылі мадэрн. Пабудова дзівіць сваёй асіметрычнасцю. Велізарнае мазаічнае пано і пышны ляпны радавы герб надаюць капліцы запамінальны выгляд.
З'явілася гэтая пабудова на цэнтральнай плошчы паселішча прыкладна ў 20-я гг. XIX ст. Сёння тут працуе аптэка. Менавіта тут наш знакаміты паэт, гісторык і перакладчык Уладзіслаў Сыракомля пачуў ад фурмана сумную гісторыю, па якой напісаў верш «Паштальён». Сюды паэт часта прыязджаў з Залучча, дзе жыў з сям'ёй з 1844 па 1853 гг.
Па праекце архітэктара Бернардоні на месцы больш старой драўлянай каталіцкай святыні на сродкі Радзівіла Сіроткі быў узведзены каменны храм у стылі рэнесансу і барока. Пасля паўстання 1863-1864 гг. па распараджэнні ўладаў храм быў пераасвечаны ў праваслаўны. У 1946 г. савецкія ўлады ператварылі царкву ў складское памяшканне. У 1990 г. касцёл вернуты каталікам і адноўлены. Магчыма, з часам будзе адкрыта засыпаная крыпта храма.
Мірскі пейзажны парк займае плошчу каля 20 га і мае ўласныя ландшафтныя асаблівасці, сваю экзотыку і непаўторную гісторыю. Закладзены парк у першым дзесяцігоддзі ХХ ст. Парк часткова акружае штучную сажалку, тут таксама ёсць зона экзатычных раслін і тэрыторыя, некалі адведзеная пад «італьянскі сад». Масток, што злучаў бераг сажалкі з астраўкамі, на жаль, згублены.
На старажытных хрысціянскіх могілках у 1912 г. з цэглы пабудаваны праваслаўны храм у рэтраспектыўна-рускім стылі, асвячоны ў гонар Св. Георгія. Доўгі час ён быў закінуты. У 1998 г. святыня была адноўлена.
Храм пабудаваны ў 30-я гг. XVI ст. як уніяцкая царква ў стылі барока з цэглы. У пачатку XVIII ст. царква была прыпісаная да базыльянскага манастыра. Пасля паўстання 1830-1831 гг. святыня неаднаразова пашкоджвалася, у тым ліку пажарамі, але хутка аднаўлялася і ў рэшце рэшт здабыла рэтраспектыўна-рускі стыль. У храме ўсталяваныя мастацкія вітражы.
У 1609 г. пры касцёле Св. Мікалая Радзівіл Сіротка збудаваў школу і шпіталь братэрства Св. Шпаклера, магчыма, таксама па праекце Бернардоні. З часам будынак часткова перабудоўваўся, станавіўся меншы па памеры. На шчасце, захавалася мемарыяльная мармуровая пліта, умураваная ў сцяну пабудовы. На ёй можна ўбачыць дату, якая, магчыма, азначае заканчэнне будаўніцтва комплексу.
Фотагалерэя