Маршрут Сынкавічы >
Кропкі маршрута Сынкавічы
На выездзе з вёскі на Масты Правыя па дарозе Р41 можна ўбачыць мемарыяльны абеліск, які быў узведзены падчас Паўночнай вайны (XVIII ст.) у гонар шведскіх воінаў.
Царква Св. Міхаіла Арханёла выканана ў рэтраспектыўна-рускім стылі. Магчыма, у XVII ст. святыню ўзвялі як уніяцкі ці каталіцкі храм. У 1863 г. храм быў перабудаваны. У 1961 г. закрыты, але ў 1990 г. вернуты вернікам.
Першапачаткова гэтая культавая пабудова ў стылі класіцызму была ўзведзена ў выглядзе кубічнага будынка пад чатырохскатным дахам. Сцены былі складзеныя з палявога каменю ў 1838 г. Да якой канфесіі належала капліца першапачаткова, пакуль невядома. У 2010-я гг. капліцу пачалі адбудоўваць, магчыма, тады ж дабудавалі пяцігранную апсіду і атынкавалі сцены. Сёння гэта праваслаўная капліца.
Дзярэчын вядомы з XV ст. З 1537 г. – мястэчка ў складзе ВКЛ. Валодалі паселішчам Сангушкі, Вітаўт, Вішнявецкія, Адзінцэвічы. Спаса-Праабражэнская царква ў рэтраспектыўна-рускім стылі пабудавана з цэглы ў 1789 г. Тут таксама варта паглядзець вялікі будынак вадзянога млына XVIII ст. і габрэйскія могілкі. У 1913 г. на могілках пабудаваны цагляны касцёл Узнясення Дзевы Марыі ў стылі неаготыкі. Закрыты ў 1951 г. Доўгі час быў складам. У 1989 г. касцёл адрэстаўравалі і вярнулі вернікам.
Пабудаваны касцёл Св. Міхаіла Арханёла з цэглы ў стылі барока ў 1782 г. У 1866 г. перабудаваны пад царкву. У 1932 г. вернуты каталікам. Побач з касцёлам стаіць званіца ў тым жа стылі. На могілках за касцёлам захаваліся руіны капліцы-пахавальні XVIII ст.
У Парэччы захавалася магіла ўдзельнікаў паўстання 1830-1831 гг. На пакатым беразе ракі Шчары ў акружэнні векавых дрэў і каменнай агароджы ўзвышаецца царква Св. Георгія. Пабудавана яна з цэглы і каменю ў рэтраспектыўна-рускім стылі ў 1872 г. Існуе легенда, што пагорак, на якім стаіць царква, – гэта былое паганскае капішча.
У гэтай вёсцы цудоўна захаваўся вадзяны млын, пабудаваны ў 1839 г. Цокаль будынка складзены з каменю, верхні паверх драўляны. Як сцвярджаюць мясцовыя жыхары, да нядаўняга часу млын быў у працоўным стане.
У вёсцы захаваўся дабротны каменны будынак вадзянога млына, пабудаванага ў 1782 г. Млын працаваў да 1980 г., праўда, ужо на электрычным прывадзе.
У Сынкавічах можна ўбачыць царкву-крэпасць у стылі абароннага дойлідства. Храм захаваў рысы рэнесансу і готыкі. Царква Св. Міхаіла Арханёла ўзведзена з цэглы ў 1530 г. У 1880 г. яе адбудавалі. Сцвярджаюць, што гэта былы прускі замак XIV ст. У 1880 г. усталявана невялікая вежа над апсідай і разабраны купал над цэнтральнай часткай храма. Званіца ў царкве пабудавана ў 1891 г. Ад сядзібы Пуслоўскіх захаваўся будынак спіртзавода.
Фотагалерэя