Маршрут Кобрын >
Кропкі маршрута Кобрын
На плошчы Свабоды ў выдатным стане захаваліся гандлёвыя рады, пабудаваныя з цэглы на месцы старых драўляных пабудоў у 1886 г. Два рызаліты з нішамі і высокімі франтонамі надаюць пабудове архітэктурную цэласнасць і адносную ўбранасць на фоне аднастайнага і старога фасада.
Гэты цагляны касцёл у стылі класіцызму ўзведзены ў 1841 г. Пабудаваны касцёл па праекце архітэктара Міхаэліса на сродкі вернікаў. У 1962 г. савецкія ўлады закрылі касцёл. У 1990-я гг. касцёл вярнулі вернікам. У рэстаўрацыі касцёла прымалі ўдзел рэстаўратары з Польшчы. Абавязкова варта зайсці ў касцёл, каб палюбавацца ўнутраным убраннем гэтага трохнефнага храма, раздзеленага двума радамі велічнай аркады.
На вул. Савецкая, 106 можна ўбачыць будынак паштовай станцыі, узведзены з цэглы па адным з тыпавых праектаў у 1846 г. Будынак складаецца з трох аб'ёмаў, злучаных арачнымі праёмамі. Пазней станцыю дабудавалі, а асобныя будынкі аб'ядналі ў адну пабудову, якую ў далейшым прыстасавалі пад шпіталь.
Большасць будынкаў радавай забудовы Кобрына дайшлі да нашых дзён з ХІХ ст., але сярод гэтых мілых і вытанчаных асабнячкоў, жылых домікаў і гандлёвых пабудоў можна ўбачыць і будынкі XVIII ст. У першапачатковым выглядзе захаваўся будынак банка ХІХ ст., турма, пабудаваная ў 1821 г., і паштовая станцыя (1846 г.).
Узведзены гэты цагляны храм у рэтраспектыўна-рускім стылі ў 1864 г. у гонар адмены прыгоннага права. Будавалі храм па праекце архітэктара І. Калянкевіча. Да 1960 г. сабор некаторы час быў закрыты, а потым прыстасаваны пад архіў Брэсцкай вобласці. Уражвае ўнутраная прастора святыні, у якую праз вокны цэнтральнага купала трапляе вялікая колькасць дзённага святла.
Гэтую цагляную сінагогу ў стылі эклектыкі з элементамі класіцызму яшчэ называюць Вялікай сінагогай. Пабудова сапраўды ўражвае сваімі памерамі. Сінагога ўзведзена на прасторным двары ў самай дарогі ў сярэдзіне ХІХ ст. Ёсць звесткі, што сінагогу пабудавалі ў 1852 г. Адзін час у гэтай культавай пабудове дзейнічаў цэх па разліве напояў.
Заснаваны горад у ХІ ст. З 1287 г. вядомы як уласнасць валынскага князя Уладзіміра Васількавіча. З 1366 г. – уласнасць князя Альгерда. У гэты час былі ўзведзены Верхні і Ніжні замкі. Манастыр заснаваны ў 1497 г. У 1626 г. у ім праходзіў Кобрынскі царкоўны збор, на якім былі вызначаны прынцыпы арганізацыі ўніяцкай царквы. Ацалеў двухпавярховы галоўны будынак манастыра, пабудаваны ў стылі барока ў пачатку XVIII ст.
У 1889 г. на тэрыторыі старажытных могілак быў пабудаваны драўляны храм у стылі народнага дойлідства. Да асноўнага аб'ёму храма прыбудавана двух'ярусная званіца, якая адначасова з'яўляецца прытворам царквы. Купалы святыні прапарцыянальны яе памерам і выглядаюць вельмі гарманічна. На вул. Першамайскай захавалася Петрапаўлаўская царква ў стылі драўлянага дойлідства (1911 г.).
Гэты драўляны храм у стылі народнага дойлідства пабудаваны на пакатым беразе ракі Мухавец у 1746 г. Над малітоўнай залай храма лунае вялізны васьмігранны барабан купала. На кожнай грані прарэзана па акне. Побач з царквой стаіць трох'ярусная драўляная званіца.
Праваслаўны храм быў узведзены пасля паўстання 1863-1864 гг. У 1911 г. святыня была перанесена на могілкі, якія сёння знаходзяцца на вул. Першамайскай. Пабудавана царква з дрэва ў стылі народнага дойлідства з элементамі класіцызму. Магчыма, ў той жа час храм часткова перабудавалі і ўдасканалілі купальную сістэму. У храме захоўваюцца іконы XVIII – XIX стст.
Фотагалерэя