Маршрут Астроўна >
Кропкі маршрута Астроўна
Сёння гэты храм вядомы як Троіцкая царква. Першыя звесткі пра гэту святыню адносяцца да сярэдзіны XVI ст. Першапачаткова яна будавалася як касцёл на сродкі вялікага князя Жыгімонта Аўгуста. Пасля паўстання 1863-1864 гг. касцёл быў перабудаваны да непазнавальнасці, алтар нават перавярнулі на 180о. У архітэктуры храма перапляліся пяць разнастайных архітэктурных стыляў. Тут таксама можна ўбачыць руіны вялізнага будынка школы з чырвонай цэглы (1882 г.).
Тут захаваўся арыгінальны і даволі рэдкі сядзібны дом шляхецкага роду Адамавых, пабудаваны ў стылі класіцызму ў 1877 г. Першы паверх прамавугольнай формы каменны, а другі складзены з сасновага бруса. Будынку патрабуецца тэрміновая кансервацыя. Побач – рэшткі пейзажнага парку.
Яшчэ ў канцы 2014 г. гэты архітэктурны помнік нашай спадчыны быў у адносна добрым стане, планавалася яго рэканструкцыя. Але сёння ад сядзібнага дома шляхецкага роду Лукашэвічаў засталіся толькі сцены. У пажары зніклі дах дома, усе драўляныя перакрыцці і канструкцыі. Пабудаваны дом быў у класічным стылі з цэглы ў 1890 г. У руінах і гаспадарчыя пабудовы сядзібы.
Рэдкая архітэктура, рэдкі дэкор, складанае спалучэнне архітэктурных стыляў гэтага сядзібнага дома ўражвае з першага погляду. Пабудаваны ён з каменю і цэглы ў былой сядзібе Хлудзінскіх у 1869 г. Сёння дом у руінах. Затое выдатна захаваўся адзін з флігеляў. У руінах таксама пабудовы гаспадарчага двара. У 1882 г. з каменю і цэглы ўзведзена царква Св. Сергія ў псеўдарускім стылі.
Захаваліся руіны некалі якасна і адмыслова складзенага вадзянага млына. Пабудаваны ён з каменю і цэглы ў 1892 г. Нават такія руіны ў руках гаспадара могуць стаць хаця б экскурсійным аб'ектам. У цэнтры вёскі проста на газоне ляжыць аднекуль прывезены каменны крыж. Вакол яго змайстравана агароджа з ланцугоў.
Тут можна ўбачыць велічныя руіны вялізнага сядзібнага дома, ці нават палаца, шляхецкага роду Грабніцкіх. Пабудаваны ён у стылі класіцызму з цэглы ў 1824 г. Захаваліся будынкі флігеля і камендатуры, пабудаваныя ў 1924 г. Непадалёк знаходзяцца жылыя дамы, узведзеныя з цэглы яшчэ да Другой сусветнай вайны.
Добра захаваўся даволі вялікі будынак школы – двухпавярховы корпус з вялізнымі вокнамі. Пабудавана гэтая навучальная ўстанова ў 1896 г. Да нашых дзён таксама дайшла праваслаўная царква ў псеўдарускім стылі з чырвонай цэглы, пабудаваная ў 1906 г. Непадалёк ад храма ў забалочанай мясціне створаная святая крыніца.
І сёння рака Заранаўка даволі паўнаводная і шпаркая. Што тады гаварыць пра вясенні павадак, тым больш у пачатку ХІХ ст., калі вялікія і малыя водныя артэрыі Беларусі былі куды больш паўнаводнымі. Па адной з мясцовых легенд, каменны млын на Заранаўцы быў пабудаваны менавіта ў пачатку ХІХ ст. маладым чалавекам на грошы, заробленыя ў Канадзе. Толькі зрабіўшыся заможным, ён змог прасіць рукі мясцовай шляхцянкі, бацька якой марыў пра багатага жаніха для сваёй дачцы.
Ад старажытнай шляхецкай сядзібы Баршчэўскіх захаваўся дыхтоўна складзены з чырвонай цэглы будынак бровара (1893 г.). Побач знаходзіцца спіртасховішча з каменю і цэглы і некалькі цагляных гаспадарчых пабудоў. Яшчэ можна разгледзець маляўнічыя баскеты і алеі пейзажнага парку сядзібы.
Пасля будаўніцтва Рыга-Арлоўскай чыгункі, прыалкдна на сярэдзіне адрэзка паміж Полацкам і Віцебскам, у цяперашнім гарадскім пасёлку Шуміліна была ўзведзена маштабная чыгуначная станцыя. Пабудаваная яна з цэглы ў 1903 г. Побач захаваліся службовыя пабудовы, таксама ўзведзеныя з чырвонай цэглы.
Фотагалерэя