Маршрут Брэст-2 >
Кропкі маршрута Брэст-2
На вул. Міцкевіча, побач з царквой Св. Мікалая, на высокіх каменных цокалях, пабудаваных з цэглы ў стылі класіцызму, і цяпер красуюцца два гарадскіх асабняка, якія некалі належалі шляхецкаму роду Ягмінаў, а менавіта Паўлу Феліксу Ягміну, маршалку Брэст-Літоўскага павета. Дамы ўпрыгожаныя класічнымі порцікамі на высокіх масіўных калонах. Узведзеныя асабнякі ў 30-я гг. XIX ст.
Велічны будынак узведзены з цэглы ў стылі позняга класіцызму з мякка выяўленымі элементамі эклектыкі ў 1926 г. Асноўным упрыгожаннем будынка банка з'яўляецца яго фасадная частка ў выглядзе масіўнай ратонды са сферычным купалам і чатырма напалову ўтопленымі ў сцяну калонамі, якія візуальна падтрымліваюць ратонду.
Непадалёк ад набярэжнай Мухаўца ў 1906 г. узведзены цагляны будынак шпіталя мясцовай габрэйскай абшчыны ў простых, але даволі вытанчаных формах канструктывізму. Калі ўважліва прыгледзецца да знешняга дэкору будынка, то становіцца зразумела, наколькі рупліва і прафесійна былі прапрацаваныя ўсе дэталі пабудовы яшчэ на стадыі праекта.
Пасля вызваленчага паўстання 1830-31 гг. царскія ўлады адобрылі праект пабудовы крэпасці, з-за якога на гэтым месцы была амаль поўнасцю знішчаная старажытная забудова. У 1836 г. быў закладзены першы камень будучай крэпасці з працягласцю абарончых сцен у 6,5 км. Пад патрэбы крэпасці былі часткова прыстасаваныя будынкі касцёлаў і манастыроў, якія знаходзіліся на гэтай тэрыторыі. Работы працягваліся да самага пачатку Другой сусветнай вайны - 1 верасня 1939 г.
Таксама на вул. Міцкевіча, побач з гарадскім асабняком, у 1905 г. узведзены двухпавярховы будынак мужчынскай гімназіі ў стылі цаглянай архітэктуры. Будынак, асабліва яго фасадная частка, аформлены аркамі, мамікулямі і нішамі, складзенымі з той жа вохрыстай цэглы, што і сам будынак. У 1911 г. быў надбудаваны трэці паверх, які не парушыў цэласнасць і стыль пабудовы.
Варта ўдзяліць асаблівую ўвагу музеям горада. На тэрыторыі крэпасці знаходзіцца музей, прысвечаны яе гераічнай абароне. Варты ўвагі ўнікальны музей выратаваных каштоўнасцей, мастацкі музей. У калоніі Нарутовіча, у адным з дамоў старой забудовы, размясціўся музей гісторыі горада. Абавязкова варта наведаць і абласны краязнаўчы музей.
У праграму візіта ў Брэст варта ўключыць унікальны куток Брэста - музей "Бярэсце", адзіны падобны музей на тэрыторыі нашай краіны. Музей размяшчаецца пад вялізным сучасным купалам на месцы старажытнага паселішча, якое з'явілася тут на мяжы ІХ - Х стст. Былі вызваленыя ад грунту цэлыя вуліцы і кварталы драўляных дамоў паселішча. Артэфакты, якія былі знойдзеныя падчас раскопак, выстаўленыя на агляд у вітрынах музея.
Не варта абыходзіць увагай і гэты, на першы погляд, скромны невялікі двухпавярховы дом, які адносіцца да радавой забудовы горада. Узведзены ён у 1903 г. і да прыхода ў Брэст новай улады ў 1939 г. быў вядомы як публічны дом. Убачыць дом можна на вул. Арджанікідзэ, 18 Захавалася частка каменнай агароджы, якая некалі утварала ўнутраны дворык.
Акрамя раёнаў-калоній, такіх як Тартак і Нарутовіча, у горадзе, на шчасце, захавалася мноства будынкаў радавой забудовы, якія сёння ўдала выкарыстоўваюцца ў разнастайных мэтах. Магчыма, радавой забудове горада Брэста нават варта прысвяціць асобны турыстычны маршрут.
У пачатку 1921 г. Брэст-Літоўск трапіў у склад Польшчы, а ў жніўні таго ж года ў горадзе была разгорнутая грандыёзная забудова жылымі раёнамі-калоніямі Нарутовічча, Тартак, Схраніска з дамамі ў рысах барока. Па задуме польскага архітэктара Лісецкага, з часам гэтыя раёны павінны былі стаць часткай забудовы ў выглядзе горада-саду. Гэта ўнікальная частка Брэста варта ўвагі кожнага вандроўніка.
Фотагалерэя