Маршрут Германовічы >
Кропкі маршрута Германовічы
У гэтай вёсцы можна ўбачыць яшчэ адзін драўляны стараверскі храм. Пабудавана Успенская царква ў рысах народнага дойлідства ў самым пачатку ХХ ст., магчыма, да 1905 г. Толькі купалы святыні не даюць зблытаць яе са звычайным жылым домам. Вокны ў царкве аформленыя разнымі ліштвамі і аканіцамі. Над уваходам просты аднаскатны навес на распорках.
У 1770 г. з цэглы пабудаваны велічны касцёл Праабражэння Гасподняга ў стылі позняга барока з элементамі класіцызму. Сёння храм аднаўляюць і рэстаўруюць. У 1785 г. у вёсцы, у маёнтку Шырынаў, узведзены сядзібны дом у стылі класіцызму. Захавалася драўляная стараверская Успенская царква, пабудаваная ў 1926 г. Некалькі дамоў радавой забудовы пачатку ХХ ст. і сёння жылыя.
На гэтым месцы некалі стаяў старажытны драўляны стараверскі храм. У 1882 г. царква згінула ў пажары. У 1905 г. узведзена новая драўляная святыня, таксама стараверская. Новы храм з ярка выражанымі рысамі народнага дойлідства асвечаны ў гонар Св. Тройцы. Нашмат пазней над царквой узнесліся сціплыя драўляныя купалы з вытанчанымі макаўкамі.
У 1879 г. тут пабудаваны праваслаўны храм з цэглы і каменю ў гонар Св. Мікалая. Магчыма, ён стаіць на месцы старажытнага драўлянага ўніяцкага храма, які быў разабраны з-за трухлявасці. Яшчэ адна драўляная святыня – Троіцкі касцёл, пабудаваны ў класічным стылі ў 1766 г. Некалькі разоў аднаўляўся. Побач – драўляная званіца 1926 г. Захавалася некалькі дамоў радавой забудовы (ХІХ ст.).
Вадзяны млын з цэглы пабудаваны ў 1869 г. У сярэдзіне ХХ ст., пры савецкай уладзе, з-за зношанасці асноўных механізмаў і абмялення ракі ў млыне ўсталявалі электрычны рухавік, і ён працаваў ажно да сярэдзіны 1980-х гг. Сёння будынак закінуты, хаця пры малых затратах яго можна было б ператварыць ў вытворчае ці нават жылое памяшканне.
На значнай адлегласці ад вёскі на пакатым узвышшы з 1750 г. стаіць гэты каталіцкі храм. Пабудаваная гэтая капліца Св. Міхаіла Арханёла з дрэва ў класічным стылі з элементамі барока. У самым пачатку ХХ ст. святыню ашалявалі і ўзвялі новы сціплы купал. Побач з капліцай захаваліся векавыя лістоўніцы, магчыма, равесніцы капліцы.
У 1912 г. у гэтым гарадскім пасёлку ўзведзена драўляная Успенская царква ў стылі мадэрн. У былым шляхецкім маёнтку Лапацінскіх захаваўся цагляны флігель, пабудаваны ў 1874 г., і руіны капліцы-пахавальні (сярэдзіна ХІХ ст.). Тут таксама знаходзіцца сядзіба Федаровічаў. Ад яе захаваўся каменны сядзібны дом (1903 г.) і двухпавярховы вадзяны млын, пабудаваны з цэглы ў 1922 г. Вартая ўвагі і каменная царква ў гонар іконы "Усіх Смуткуючых Радасць".
Тут можна ўбачыць цагляны праваслаўны храм, пабудаваны ў класічным стылі з элементамі рэтраспектыўна-рускага стылю, дададзенымі ў 1868 г. пры перабудове пасля падаўлення паўстання К. Каліноўскага. Першапачаткова ж гэты храм узводзіўся ў 1828 г. як каталіцкі. Трохарачная брама была нязначна перабудаваная.
Фотагалерэя