Маршрут Слонім-1 >
Кропкі маршрута Слонім-1
Гэтая штучная водная артэрыя будавалася на працягу амаль чвэрці стагоддзя (1767-1783 гг.). Канал Агінскага меў мэтай злучыць ракі Шчару і Ясельду для разнастайных перавозак, пачынаючы ад пасажырскіх судоў і заканчваючы сплавам лесу. Вялікія разбурэнні канал перанёс падчас Другой сусветнай вайны. У сваім першапачатковым выглядзе ён так і не быў адноўлены. Сёння ён выглядае як звычайная рака, якая працякае праз горад.
Першы драўляны касцёл, які стаяў на гэтым месцы, быў знішчаны рускімі войскамі падчас «Крывавага патопу» (вайны 1654-1667 гг.). У 1775 г. тут была ўзведзена мураваная каталіцкая святыня ў стылі віленскага барока, закрытая рускімі ўладамі пасля паўстання 1830-1831 г. У 1925 г. храм быў адноўлены польскімі рэстаўратарамі. Пасля Другой сусветнай вайны савецкія ўлады наладзілі ў касцёле склад солі. Толькі ў 1990 г. храм быў зноў адрэстаўраваны і вернуты вернікам.
У канцы 70-х гг. XVII ст. збудаваны касцёл Беззаганнага Зачацця Найсвяцейшай Дзевы Марыі ў стылі класіцызму з элементамі барока і ракако. Адназальная аднакупальная базіліка мае масіўную паўкруглую апсіду. У 1764 г. пабудаваныя карпусы кляштара бернардынак з замкнёным унутраным дворыкам. Пасля паўстання 1863-1864 гг. дзейнасць манастыра была забароненая маскоўскімі ўладамі. З 1907 г. i касцёл, і манастыр дзейнічалі. Пасля Другой сусветнай вайны савецкія ўлады пераабсталявалі касцёл пад бальніцу. У 1993 г. святыня была вернута вернікам.
У 1630 г. узведзены жылыя карпусы кляштара. Прыкладна праз дзесяць гадоў на сродкі вядомых шляхецкіх родаў збудаваны цагляны касцёл Святой Тройцы ў стылі барока і ракако. Пасля паўстання 1863-1864 гг. царскія ўлады перадалі і касцёл, і манастыр праваслаўнай царкве. У 1920-я гг. пабудовы кляштара выкарыстоўваліся як розныя адміністрацыйныя ўстановы, а пазней як інтэрнат для навучэнцаў.
Драўляны корпус манастыра пабудаваны на сродкі А. Пшаслаўскай у 1669 г. У 1801 г. драўляныя манастырскія пабудовы былі нанова ўзведзены з цэглы. Пасля падаўлення паўстання 1863-1864 гг. манастыр быў зачынены, а ў яго сценах стварылі турму для палонных паўстанцаў. Сёння Г-падобны корпус адноўлены і выкарыстоўваецца пад навучальную ўстанову. Захаваліся крыжападобныя перакрыцці інтэр'еру былога манастыра.
Узводзілася гэтая вытанчаная і прапарцыйна вывераная пабудова як малітоўны дом габрэйскай абшчыны горада ў сярэдзіне ХIХ ст. Сінагога не была дабудавана па прычыне недахопу грашовых сродкаў. З часам недабудаваны будынак быў перададзены на баланс уладам горада, якія паспяхова дабудавалі яго ўжо як народны дом. У 2014 г., пасля рэканструкцыі дома, у ім адкрыўся Слонімскі драматычны тэатр.
Перад намі велічная скульптура аднаму з вялікіх канцлераў і гетманаў Вялікага княства Літоўскага. Леў Сапега з'яўляўся ў тым ліку галоўным аўтарам Статута ВКЛ 1588 г., дзеянне якога доўжылася аж да 1840 г. Вышыня статуі складае чатыры метры. Усталяваная скульптура ў гістарычнай частцы горада ў жніўні 2019 г.
У 1680 г. тут пабудаваны каменны касцёл. У 1856 г. быў спалены і ён, і пабудовы кляштара дамініканаў. Цагляная капліца ў стылі барока і ракако пабудавана ў 1745 г. у выглядзе касцельнай вежы. Яна нагадвае аб разбураным храме і сёння. На другім ярусе званіцы ўсталяваная скульптура Св. Дамініка, у гонар якога і асвечана капліца.
Наяўнасць у горадзе ратушы кажа пра тое, што некалі гэты горад меў Магдэбургскае права з наяўнасцю ўласнага герба. Горад аўтаматычна прылічваўся да шэрагу прагрэсіўных і высокакультурных гарадоў Еўропы. Слонімская ратуша ў стылі барока пабудаваная ў сярэдзіне XVIII ст. Некалькі разоў яна была значна перабудаваная. Сёння ў ёй знаходзіцца бібліятэка.
Галоўная сінагога Слоніма ў стылі барока ўзведзена з цэглы ў 1642 г. Пабудова мае абарончы характар. Таўшчыня сцен складае каля двух метраў. Пасля Другой сусветнай вайны савецкія ўлады наладзілі ў сінагозе таварны склад, а затым ператварылі яе ў гандлёвую кропку. У пачатку ХХІ ст. яна перайшла ва ўласнасць габрэйскай супольнасці Беларусі. З вялікай цяжкасцю вядуцца рэстаўрацыйныя працы. Размяшчаецца былая сінагога па вул. Камуністычнай.
Фотагалерэя